Ақтөбе облысында "Ақтөбе - құтты мекен" халықаралық форумына дайындық толаққанды жүргізілуде

Ауқымды іс-шара өңірде қыркүйек айының соңында ҚР президенті Нұрсұлтан Назарбаевтың «Болашаққа бағдар: рухани жаңғыру» атты бағдарламалық мақаласының "Туған жер" жобасы аясында өтпек. 

Ақтөбе қаласын көріктендіру, спорттық, мəдени нысандарды 15 елден келетін қонақтарды қабылдауға дайындау мəселелері облыс əкімі Бердібек Сапарбаевтың төрағалығымен талқыланды.

Облыс əкімінің орынбасары Қайрат Бекеновтың айтуынша, осы мақсатта құрамына жергілікті полиция қызметінің, жер қатынастары, ТКШ қызметкерлері кіретін 14 мобильдік топ құрылған. Күн сайын топтар қаланы аралап шығып, тиісті талапқа сай емес нысандар мен участоктарды анықтайды да, олардың иелерінен тиісті қалыпқа келтіруін сұрайды. Мобильдік топтың бес жұмыс күні ішінде осы немесе өзгеде заң бұзушылықтарды жоюды қажет ететін 1800 нысан анықталды. 

Олардың қатарында сауда нүктелері, көшелер, ғимараттардың қасбеттері, жарнамалық құрылымдар бар. Бүгінде 150 нысандағы жұмыстар аяқталды.

- Форумды өткізуге 20 күннен аз уақыт қалды. Сондықтан, жұмысты күшейтіп, қаланы қонақтарды күтіп алуға мұқият дайындау қажет. Барлық участоктарды, жолдарды, гүл бақтарын, бизнес нысандарын қалпына келтіріп, көшелерді көгалдандыру мен санитарлық тазалау шараларын қолдану керек. Ақтөбе форумға қатысушыларды лайықты қарсы алуы тиіс,-деп атап өтті облыс әкімі.

«Ақтөбе - құтты мекен» форумы туған жерге деген патриотизм мен сүйіспеншілікті қалыптастыру, Ақтөбе облысының белгілі бір жетістіктерге жеткен тумаларын туған өлкелерінің әлеуметтік-экономикалық дамуына үлес қосуға тарту  мақсатында өткізілуде. Ірі шараға 15 елден келетін 300-ден аса адам қатысады деп күтілуде. Олардың қатарында тек Қазақстанда ғана емес, шетелде де тұрып жатқан  мемлекет қайраткерлері, ірі кәсіпкерлер, мәдениет пен өнер қайраткерлері, атақты спортшылар бар.

Бұдан өзге, Бердібек Сапарбаев 9 қыркүйек пен 9 қараша аралығында өңірде жалпы облыстық сенбіліктердің болатынын хабарлады. Соған байланысты жауапты тұлғаларға қоқысты уақтында шығарып, көлікпен қамтамасыз ету тапсырылды.

 

 

Ақтөбе облысы әкімінің баспасөз қызметі